500 þúsund króna styrkur til Píeta frá Ísey skyr bar og viðskiptavinum
Í dag afhenti Ísey skyr bar og viðskiptavinir þeirra Píeta samtökunum 500.000 króna styrk sem er afrakstur söfnunar sem stóð yfir í júlí.
Söfnunin var hluti af átaki til að styðja við einstakt verkefni Bergs Vilhjálmssonar, slökkviliðs- og sjúkraflutningamanns, sem lagði í sumar af stað frá Goðafossi með stefnu á Reykjavík. Á leiðinni fór hann yfir hrjóstugar víðáttur Sprengisands með 100 kílóa kerru í eftirdragi. Markmiðið var tvíþætt; annars vegar að vekja athygli á mikilvægi andlegrar heilsu og hins vegar að safna fjármunum til styrktar Píeta samtökunum, sem veita ókeypis stuðning og ráðgjöf fólki í sjálfsvígshættu og aðstandendum þeirra.
Viðskiptavinir Íseyjar skyr bars tóku virkan þátt í átakinu með því að kaupa sérstaka próteinskál á afgreiðslustöðum Íseyjar um allt land. Hluti af andvirðinu rann óskiptur til Píeta og söfnuðust þannig 500.000 krónur.
Magnús Hafliðason, framkvæmdastjóri N1 sem rekur Ísey skyr bar á Íslandi, segir að þetta sé dæmi um hvað sameiginlegt átak geti skilað miklu:
„Okkur þykir vænt um að geta stutt svona mikilvægt málefni og viljum þakka öllum viðskiptavinum okkar sem lögðu sitt af mörkum. Þetta sýnir að þegar fólk sameinast um góðan málstað er hægt að ná ótrúlegum árangri.“
Bergur þakkar einnig fyrir stuðninginn og segir að hver króna skipti máli í forvarnarstarfi Píeta:
„Það gleður mig að sjá hversu margir tóku þátt og sýndu í verki að þeim er ekki sama. Slíkur stuðningur gefur verkefninu enn meiri kraft.“
Á myndinni má sjá Ísey skyr bar afhenda Bergi og Píeta samtökunum ávísun að upphæðinni.
Frá hægri Jóna Friðriksdóttir verkefnastjóri N1, Bergur Vilhjálmsson göngugarpur svo Magnús Hafliðason, framkvæmdastjóri N1