Eggert Benedikt Guðmundsson

Forstjóri N1

Eggert Benedikt er fæddur árið 1963 en hann er með Dipl.-Ing. gráðu í rafmagnsverkfræði frá háskólanum í Karlsruhe og MBA frá IESE viðskiptaháskólanum í Barcelona. Eggert starfaði sem verkfræðingur hjá Íslenska járnblendifélaginu árin 1990-1995. Að MBA náminu loknu hóf Eggert störf hjá raftækjaframleiðandanum Philips í Belgíu. Sumarið 2000 flutti Eggert til San José í Kaliforníu og starfaði þar við vörustjórnun, markaðsstjórnun og viðskiptaþróun fyrir Philips. Hann flutti svo heim í júní 2004 til að taka við stöðu markaðsstjóra HB Granda. Hálfu ári síðar tók hann við sem forstjóri félagsins og gegndi því starfi allt til haustsins 2012 þegar hann var ráðinn forstjóri N1. Fyrir utan störf sín hjá N1 situr Eggert einnig í stjórn Íslandsstofu og er varaformaður Viðskiptaráðs Íslands.

Ingunn Elín Sveinsdóttir

Framkvæmdastjóri einstaklingssviðs N1

Ingunn er fædd árið 1958 en hún er með Cand. oecon. gráðu í viðskiptafræði frá Háskóla Íslands. Hún starfaði sem fjármálastjóri Áburðarverksmiðju ríkisins á árunum 1991-1997 en þá hóf hún störf hjá Íslandsbanka. Þar gegndi hún starfi viðskiptastjóra 1997-2000 og síðar útibússtjóra í Mjódd 2000-2006. Ingunn hefur starfað hjá N1 frá 2006 en hún var framkvæmdastjóri Neytendasviðs 2006-2010, framkvæmdastjóri Sölu- og Markaðssviðs 2010-2012 og í dag gegnir hún starfi framkvæmdastjóra einstaklingssviðs. Fyrir utan störf sín hjá N1 situr Ingunn einnig í stjórnum Lyfju hf. og Flutningsjöfnunarsjóðs.

Hinrik Örn Bjarnason

Framkvæmdastjóri fyrirtækjasviðs N1

Hinrik er fæddur árið 1972 en hann er með Cand. oecon. gráðu í viðskiptafræði frá Háskóla Íslands. Að loknu námi starfaði hann í fimm ár sem sölustjóri hjá SÍF hf. og dótturfyrirtækjum, m.a. í tvö ár í Englandi. Í upphafi árs 2003 tók Hinrik við starfi forstöðumanns útflutningssviðs Samskipa og sinnti því til 2007. Árin 2007-2008 starfaði hann hjá Landsbankanum sem yfirmaður erlends sjávarútvegsteymis bankans. Starfið fólst m.a. í fjármögnun á alþjóðlegum sjávarútvegsfyrirtækjum. Frá 2009 og þar til í janúar 2013 starfaði Hinrik í Hamborg sem framkvæmdastjóri Eimskips í Þýskalandi. Um miðjan janúar 2013 hóf hann svo störf sem framkvæmdastjóri fyrirtækjasviðs hjá N1.

Eggert Þór Kristófersson

Framkvæmdastjóri fjármálasviðs

Eggert er fæddur árið 1970 en hann er með Cand. oecon. gráðu i viðskiptafræði frá Háskóla Íslands en hann er einnig löggiltur verðbréfamiðlari. Á árunum 1995-1997 starfaði Eggert hjá VÍB hf. sem ráðgjafi í einstaklingsþjónustu. Eggert var for-stöðumaður sölu og þjónustu hjá Lánasýslu ríkisins 1997-1999. Hann starfaði hjá Íslandsbanka-FBA og Íslandsbanka hf. 2000-2004 en þar gegndi hann stöðu yfirmanns skuldabréfastöðu bankanna. Á árunum 2005-2008 var Eggert framkvæmdastjóri rekstrarfélags verðbréfasjóða Íslandsbanka og síðar Glitnis banka hf. Árið 2008 starfaði Eggert sem framkvæmdastjóri eignastýringar Glitnis banka á Íslandi og Finnlandi en ári síðar gekk hann til liðs við fjárfestingafélagið Sjávarsýn ehf.þar sem hann gegndi starfi framkvæmdastjóra. Í júní 2011 tók Eggert svo við starfi framkvæmdastjóra fjármálasviðs N1. Fyrir utan störf sín hjá N1 situr Eggert einnig í stjórn Nordic Marine Oil og er stjórnarformaður Malik Supply.

Kolbeinn Finnsson

Framkvæmdastjóri starfsmannasviðs N1

Kolbeinn er fæddur árið 1964 og er með B.Sc. gráðu í hagfræði frá Háskóla Íslands. Hann á að
baki langan starfsferil hjá N1 og forvera þess Olíufélaginu hf. Kolbeinn starfaði á fjármálasviði Olíufélagsins hf. 1987-1991 og var deildarstjóri hagdeildar 1991—2001. Árin 2001-2007 var Kolbeinn starfsmannastjóri og yfirmaður upplýsingatæknimála ásamt því að sitja í framkvæmdastjórn félagsins. Árið 2007 tók Kolbeinn svo við starfi framkvæmdastjóra starfsmannasviðs N1.

Halldór Harðarson

Framkvæmdastjóri markaðssviðs N1

Halldór er fæddur árið 1973 en hann er með B.Sc. gráðu í fjármálum frá Háskóla Íslands. Hann er með 16 ára starfsreynslu í markaðsmálum bæði á Íslandi og alþjóðlega. Halldór hefur m.a. starfað sem forstöðumaður markaðsdeildar Icelandair 2005-2008, framkvæmdastjóri framleiðslu- og markaðsdeildar Latabæjar 2008-2009 og forstöðumaður markaðsdeildar Símans 2010-2013. Halldór hóf störf sem framkvæmdastjóri markaðssviðs N1 um miðjan apríl 2013.