Samfélagsmál

Í stuðningi sínum við samfélagið leggur N1 áherslu á forvarna- og íþróttastarf. Félagið styrkir barna- og unglingastarf íþróttafélaga víða um land.
N1 gerðist aðalstyrktaraðili HSÍ haustið 2007 og síðan þá hafa efstu deildir í handknattleik karla og kvenna borið nafn fyrirtækisins.

N1 mótið á Akureyri er stærsta árlega knatt-spyrnumót landsins með hátt á annað þúsund þátttakendum á aldrinum 10 til 12 ára auk þjálfara, liðsstjóra og foreldra. Mótið setur því mikinn svip á höfuðstað Norðurlands í fjóra daga um mánaðamótin júní/júlí ár hvert.

Félagið er aðalbakhjarl N1 Reykjavíkurskákmótsins 2013 og 2014. Íslensk börn og ungmenni fá þar tækifæri til að tefla á alþjóðlegu stórmóti með mörgum bestu skákmönnum heims. Mótið í ár var firnavel skipað og hið fjölmennasta frá upphafi.

N1 tekur einnig þátt í samstarfi við skátana um ýmis verkefni, ýmsum tilfallandi söfnunum á landsvísu, stuðningi við Mæðrastyrksnefnd og samstarfi við hin ýmsu félög í háskólaumhverfinu á Íslandi.

Umhverfis- og gæðamál

N1 er í fararbroddi við innleiðingu á umhverfisvænum orkugjöfum. Félagið hefur undanfarin ár boðið upp á metangas á stöðvum sínum við Bíldshöfða og Tinhellu í Hafnarfirði. Þá býður félagið biodísel, sem er innlend framleiðsla unnin úr lífrænum úrgangi sláturhúsa, á átta þjónustustöðvum sínum.

Félagið vinnur með markvissum aðgerðum að því að lágmarka umhverfisáhrif starfseminnar, m.a. innleiðingu á formlegu umhverfisstjórnunarkerfi. Félagið fylgir alþjóðlega umhverfisstjórnunarstaðlinum ISO 14001 og fær óháðan aðila til að taka út og votta starfsstöðvar sínar . Sex starfsstöðvar N1 hafa þegar hlotið vottun og fimm til viðbótar eru í innleiðingarferli.

Til að auka umhverfisvitund og öryggismál allra starfsmanna hefur N1 haldið öryggisviku þrjú ár í röð. Þá eru uppfærðar neyðar- og viðbragðsáætlanir, einkum tengdar umhverfi og öryggi rekstrar og starfsmanna. Í öðrum stöðlum  sem fyrirtækið uppfyllir, svo sem frá Michelin og ExxonMobil, er einnig lögð rík áhersla á umhverfisstjórnun og meðhöndlun úrgangs.