Gott er að hafa í huga að hafa upplýsingar í ferilskrá hnitmiðaðar og að texti sé ekki of langur. Gott er að miða við að hún sé ekki lengri en tvær síður.
Atvinnurekandi notar ferilskrár til að bera saman umsækjendur og ef til viðtals kemur er hægt að ræða frekar um það sem kemur fram í henni.

Hér fylgja nokkrar ábendingar sem umsækjendur geta haft í huga við gerð ferilskrár:

1. Persónuupplýsingar:

          a. Fullt nafn
          b. Kennitala     
          c. Heimilisfang
          d. Símanúmer
          e. Netfang

2. Menntun, námskeið eða réttindi

Umsækjandi tilgreinir þá menntun, þau námskeið eða réttindi sem hann hefur og telur mikilvægt að atvinnurekandi viti um:

          a. Heiti réttinda, náms eða gráðu. Stundum er einnig gott að skrifa stuttlega um námið, helstu áfanga sem umsækjandi sótti og geta nýst vel í starfi og upplýsingar um lokaverkefni. Tilgreinið fyrst það nám sem umsækjandi lauk síðast.
          b. Skóli.
          c. Námstími eða áætluð námslok.
          d. Hafi umsækjandi sótt námskeið sem hann telur að muni nýtast honum er einnig gott að tilgreina þau hér.

3. Starfsreynsla

Greinið frá fyrri störfum, vinnuveitendum og tímabilum. Gott er að skrifa stuttlega um hvað fólst í störfunum, ábyrgðarsvið og helstu verkefni. Nefnið fyrst þann vinnustað sem þið störfuðuð á síðast eða starfið enn á.

4. Tölvuþekking

Tilgreinið þau tölvuforrit sem þið hafið þekkingu á og hafið notað við fyrri störf til dæmis.

5. Tungumálaþekking

Tilgreinið þau tungumál sem þið hafið tök á og gerið grein fyrir hversu vel þið getið skilið, talað og skrifað á viðkomandi tungumálum.

6. Persónutengd atriði

Umsækjandi er hvattur til að segja stuttlega frá markmiðum sínum, áhugamálum, félagsstörfum, persónueinkennum, styrkleikum, áhugasviði og öðru slíku.

7. Umsagnaraðilar

Mikilvægt er að gefa upp 2-3 umsagnaraðila. Það geta verið fyrrum yfirmenn í starfi, kennarar eða annað slíkt. Gefið upp fullt nafn þeirra, starfsheiti, vinnustað og símanúmar. Gott er að hafa leyfi frá viðkomandi umsagnaraðilum áður en þeir eru skráðir sem slíkir.
Gætið þess að gefa ekki upp ættingja sem  meðmælendur.
Takið fram ef þið viljið ekki að haft sé samband við meðmælendur fyrr en vinnuveitandi hefur ráðfært sig við ykkur.

8. Fylgiskjöl

Vilji umsækjendur láta fylgja prófskírteini, vottorð eða annað slíkt fylgja umsókninni er ágætt að geta þess neðst í ferilskránni.

9. Kynningarbréf

Kynningarbréf er ágætis viðbót við ferilskrána en þó ekki nauðsynlegt. Í slíku bréfi gerir umsækjandinn mjög stuttlega grein fyrir umsókn sinni, hvers vegna hann telji sig hæfan í starfið sem auglýst er og annað slíkt.

Á heimasíðu Capacent má nálgast fleiri góð ráð við atvinnuleit og dæmi um uppsetningu ferilskrár: http://capacent.is/Thjonusta/Radningar/Umsaekjendur/God-rad

Á heimasíðu Hagvangs má einnig finna dæmi um uppsetningu ferilskrár: http://hagvangur.is/radningar/umsaekjendur/