Við leit að nýjum starfskrafti hefst ferlið iðulega á því að laus störf eru auglýst. Umsækjendur senda ferilskrár og umsóknir á vinnuveitanda sem vinnur úr þeim og velur þá sem koma til greina.

Næsta skref er að boða í atvinnuviðtöl þar sem umsækjendur fá tækifæri til að kynna sig betur og efni ferilskrárinnar. Vinnuveitandi gerir einnig nánar grein fyrir starfinu og þeim verkefnum sem því fylgir. Einnig kynnir hann fyrirtækið nánar og starfsemi þess.

Í viðtalinu hefur umsækjandi einnig tækifæri til að spyrja spurninga um starfið, ábyrgðarsvið og hlutverk. Umsækjendur eru hvattir til að gera það og koma undirbúnir í viðtalið til þess að báðir aðilar fái mikið út úr því. Það getur hann meðal annars gert með því að kynna sér heimasíðu fyrirtækisins og starfsstöðvar þess sé það mögulegt.

Umsækjandi þarf að vera undir það búinn að svara spurningum um sín fyrri störf, þekkingu, styrkleika sína og veikleika og fleira. Því er mikilvægt að mæta vel undirbúinn í atvinnuviðtöl og geta svarað spurningum um sjálfan sig.

Gott að hafa í huga

• Mikilvægt er að mæta á réttum tíma í viðtalið.
• Verið vel til höfð og snyrtileg.
• Kynntu þér fyrirtækið eins og kostur er.
• Leiðið hugann að því fyrirfram hverju þú vilt koma á framfæri í viðtalinu.
• Ákveðið áður en þið mætið í viðtalið hverju þið viljið spyrja vinnuveitandann að. Ekki er verra að vera með minnisblað með sér því erfitt getur verið að muna allt saman þegar í viðtalið er komið.
• Oftar en ekki sækja margir um hvert starf. Ekki líta á það sem höfnun að hljóta ekki starfið, líttu frekar á það sem hrós að hafa komist í viðtal.

Gangi þér vel!