Fréttir
N1 dregur íslenska fánann að húni í stað fyrirtækisfána
Hvetjum fólk og önnur fyrirtæki til að gera slíkt hið sama
N1 hefur dregið upp íslenska fánann á þjónustustöðvum sínum um allt land og við höfuðstöðvar sínar í stað hinna venjulegu fyrirtækjafána. Uppátækið hefur vakið mikla athygli og ánægju meðal starfsfólks og viðskiptavina N1.
„Tilgangurinn er einfaldlega sá að sýna samstöðu í þeim erfiðleikum sem ganga yfir þjóðina þessa dagana.“, segir Hermann Guðmundsson, forstjóri N1. „Íslenski fáninn er sameiningartáknið og oft var þörf, en nú er nauðsyn.“ Þá hefur N1 aukið vægi íslenskra vara í útstillingum í verslunum sínum. „Það er mikilvægt að íslenskt atvinnulíf fjari ekki út. Á tímum sem þessum ber okkur að styðja við bakið á íslenskum iðnaði og þjónustu eins og kostur er “.
Hermann hvetur fólk og önnur fyrirtæki til að fylgja fordæmi N1 og draga íslenska fánann að húni. „Það stappar stálinu í þjóðina að sjá íslenska fánann sem víðast.“
Í fánalögum kemur fram að fáninn skuli aldrei vera dreginn á stöng fyrir kl. 7 að morgni og sé að jafnaði ekki uppi lengur en til sólarlags.
