Fréttir
ENDURO kappreiðar í Reiðhöllinni í Víðidal
Sunnudaginn 14. febrúar munu Nítró, N1 og Vélhjólaíþróttaklúbburinn bjóða til mótorsportveislu í Reiðhöllinni í Víðidal. Þetta er í annað skipti sem keppni af þessu tagi er haldin á Íslandi. Síðasta keppni fór fram í desember og var bæði keppendum og áhorfendum ógleymanleg.
Skemmtun fyrir áhorfendur, áskorun fyrir keppendur
Síðast reyndist brautin mörgum keppendum mjög erfið og má búast við því að menn mæti enn grimmari til leiks nú. Sem fyrr eiga keppendur von á spennandi hindrunum; stökkpöllum, staurabreiðum, stórgrýti, hleðslusteina- og dekkjahrúgum, kubbagryfjum og mörgu fleira. Brautin um helgina verður þó með aðeins öðru sniði og býður upp á enn harðari keppni allra bestu hjólaökumanna landsins.
Hörð og spennandi keppni
Allir bestu torfæruhjólaökumenn landsins munu mæta til keppni, hungraðir að standa sig enn betur en síðast og ná titli í þessari fyrstu keppni. Núna verða keyrðir færri riðlar og dagskráin verður mun áhorfendavænni. Fyrstu menn í hverjum riðli og „Síðasta séns“ komast áfram í lokariðillinn þar sem allt verður lagt undir og búast má við harðri keppni og mikilli skemmtun.
Glæsileg verðlaun
Sigurvegarar keppninnar hljóta glæsileg verðlaun en öll keppnisgjöld renna óskipt til þeirra sem keppa í lokariðlinum.
Endurokrosskeppnir af þessu tagi njóta mikilla vinsælda í Evrópu og Bandaríkjunum. Veðrið spillir oft fyrir keppnishaldi hér á landi og því hafa ekki skapast tækifæri áður til halda keppni af þessu tagi á Íslandi. Keppnin er haldin öllum hjólafólki til skemmtunar en ekki síður sem fjáröflun fyrir Vélhjólaíþróttaklúbbinn til að halda áfram uppbyggingarstarfi félagsins.
Takið því frá sunnudaginn 14. febrúar kl. 14-16 og sjáumst í höllinni
Skráning keppenda er hafin á www.motocross.is en fjöldi keppenda er takmarkaður. Keppnisstjórn áskilur sér rétt til að velja og hafna keppendum.
