Fréttir
Frístundabíll fyrir börn og unglinga
Tilraunaverkefni um aukin lífsgæði í Hafnarfirði
N1, Hópbílar, Hafnarfjarðarbær, Alcan á Íslandi og Fjarðarkaup hafa tekið höndum saman um metnaðarfullt samfélagsverkefni í Hafnarfirði sem ber heitið FRÍSTUNDABÍLLINN.
Verkefnið Frístundabíllinn gengur út á að veita örugga og góða akstursþjónustu fyrir börn og unglinga á aldrinum 6 - 20 ára alla virka daga. Tilgangur verkefnisins er að draga úr tímafreku „skutli“ foreldra til að koma börnum sínum til og frá íþrótta- og tómstundastarfi, með því að bjóða upp á raunhæfan og öruggan valkost.
Um er að ræða tilraunaverkefni sem lýkur 31. maí og verður þá tekin ákvörðun um framhald ef móttökur verða góðar. Til að gera verkefnið mögulegt hafa Hópbílar, Alcan á Íslandi, N1 og Fjarðarkaup styrkt framkvæmd þess, en öll hafa þau stutt myndarlega við íþrótta- og tómstundamál í Hafnarfirði. Auk þessa veitir Hafnarfjarðarbær verkefninu mjög þýðingarmikinn stuðning.
Það er trú þeirra sem að verkefninu standa að það feli í sér margvíslegan ávinning, meðal annars efnahagslegan og umhverfislegan, auk þess að stuðla að auknum lífsgæðum.
Nánari upplýsingar um verkefnið er að finna á vef þess, www.fristundabillinn.is.
