Fréttir
Hugmyndafundur START 09 Framleiðum hugmyndir var haldinn í IÐNÓ í gær
Hugmyndafundur START 09 Framleiðum hugmyndir var haldinn í IÐNÓ í gær. Setið var í hverju sæti og færri komust að en vildu. Mikil orka var í salnum. Til marks um það hóf fólk að stappa niður fótum svo undirtók í þessu gamla húsi til að byggja upp spennu þegar sigurvegarar í hugmyndasamkeppninni Start09 voru kynntir.
JEFF TAYLOR, sem hélt sams konar vinnustofu í Harvard-háskóla fyrir þremur vikum, byrjaði erindi sitt á að spila teknó tónlist í fullu blasti og dansa einn á sviðinu. JEFF fer óhefðbundnar og skapandi leiðir í að ná til áhorfenda og í þetta sinn kenndi hann fundarmönnum meðal annars að opna banana á réttan hátt og spila á ósýnilegt píanó. JEFF vill meina að 
ef fólk er vandræðalegt þá eigi það betur með að hlusta og læra eitthvað.
JEFF hefur mikla trú á Íslendingum. Hann hvetur þjóðina til að hugsa stórt og út fyrir boxið. JEFF lítur á kreppuna sem frábært tækifæri til að taka nýja stefnu, opna fyrir nýjar hugmyndir og að hans mati getur Ísland tekið forystu á nýjum sviðum.
JEFF var í góðum félagsskap á sviðnu og naut stuðnings frá þeim Guðjóni Má Guðjónssyni og Guðmundi Oddi frá LHÍ. Dómnefnd hugmyndasamkeppninnar eyddi löngum stundum í að lesa yfir þær 
fjölmörgu hugmyndir sem bárust í keppnina og að velja sigurvegara hugmyndasamkeppninnar. Valið reyndist erfitt því rúmlega 200 hugmyndir voru sendar inn.
Hermann Guðmundsson forstjóri N1 og formaður dómnefndar tók það hins vegar ítrekað fram að þær þrjár hugmyndir sem báru sigur úr býtum hafi verið valdar því þær þykja eiga best við okkur Íslendinga í dag. Hins vegar muni tíminn leiða í ljós hvaða hugmyndir verða raunverulegir sigurvegarar og hvatti þannig alla sem skiluðu hugmyndum í samkeppnina að halda ótrauðir áfram og hafa trú á sínum hugmyndum.
Þessar þrjár hugmyndir skipuðu efstu sætin:
1. sæti „Remake electric" - Hilmir Ingi Jónsson (fær milljón krónur og aðstoð við að koma hugmyndinni í framkvæmd).
2. sæti „Hið íslenska norðurljósafélag“- Kristján Jónsson (fær 500 þúsund krónur og aðstoð við að koma hugmyndinni í framkvæmd).
3. sæti „Mar Biotech" - Rósant Birgisson“ (fær 250 þúsund krónur og aðstoð við að koma hugmyndinni í framkvæmd).
