Fréttir
Lukkumiðinn var seldur á N1 í Lækjargötu í Hafnarfirði
Lukkumiðinn var seldur á N1 í Lækjargötu í Hafnarfirði
- Þrír lottóvinningar hafa á þessu ári komið á miða sem keyptir voru á N1-stöðvum
- Þar af tveir þegar að potturinn var sexfaldur
- „Skemmtilegt fyrir starfsfólkið“
Gríðarleg þátttaka var í Lottóinu síðastliðinn laugardag, en þá var potturinn sexfaldur. Einungis einn var með allar tölurnar réttar og koma því rúmlega 46 miljónir króna í hans hlut.
Lukkumiðinn var keyptur á N1 við Lækjargötu í Hafnarfirði en vinningshafinn, sem er ungur Hafnfirðingur, kom við á stöðinni á leið heim af djamminu aðfararnótt laugardags. Að sögn Ingunnar Sveinsdóttur framkvæmdastjóra neytendasviðs N1 ríkir mikil ánægja hjá starfsfólki stöðvarinnar með að „hafa átt þátt í að koma svona stórum vinningi í hendurnar á heimamanni“.
Þrír lottóvinningar hafa þá á þessu ári komið á miða sem keyptir voru á N1-stöðvum. Þar af tveir tugmilljónavinningar. En síðast þegar potturinn var sexfaldur (í janúar s.l.) þá keypti einn þriggja vinningshafa miðann sinn á N1 í Mosfellsbæ. Starfsfólkið á stöðinni við Lækjargötu hélt upp á stóra vinninginn með því að gæða sér á köku í kaffitímanum í dag og fékk auk þess sendan stóran blómvönd með kveðjum úr höfuðstöðvum N1.
Vinningshafinn er enn að jafna sig eftir að hafa uppgötvað að hann ætti vinningsmiðann. Hann mun vera að íhuga að nýta tækifærið og skella sér í nám.
