Íslensk frumkvöðlaráðstefna í heilu lagi á Youtube
Fyrirlestrar Jeff Taylors, Salem Samhoud og Hermanns Guðmundssonar, sem fluttir voru á Start09 ráðstefnunni í Borgarleikhúsinu í sumar, hafa nú verið settir á vefinn. Hægt er að horfa á fyrirlestrana í 10 mínútna löngum myndbrotum á myndbandavefnum Youtube.
Fyrsta sinn að ráðstefna sem fram fer hérlendis er sett í heilu lagi á vefinn
Stórar ráðstefnur sem haldnar eru erlendis eru í auknum mæli teknar upp á myndband og settar inn á vefinn. En það hefur ekki verið gert áður hérlendis, svo vitað sé, að heil ráðstefna sé sett á vefinn með þessum hætti. Margir Íslendingar þekkja Ted-ráðstefnurnar svonefndu, en hægt er að horfa á marga áhugverða fyrirlestra sem fluttir hafa verið þar, á vefnum Ted.com.
Marka kúrsinn út úr kreppunni og inn í framtíðina
Start09 ráðstefnan ætti þó ekki að höfða síður sterkt til Íslendinga, enda fjalla fyrirlesararnir meðal annars (bæði hinir íslensku og hinir erlendu) um það hvernig íslenskir frumkvöðlar og Íslendingar almennt geti markað kúrsinn út úr kreppunni og inn í framtíðina. Fólk um land allt ætti því að geta sótt sér innblástur í myndbrotin á Youtube.
- Fyrirlestur Hermanns Guðmundssonar fjallar um hvaða hlutverk menntun og framtíðarsýn þurfi að leika í uppbyggingu íslensks samfélags. Hermann er forstjóri fyrirtækisins N1 og hefur nýlega sagt að hann telji að botninum sé náð í efnahagskreppunni á Íslandi.
- Fyrirlestur Salem Samhoud fjallar um stefnumótunarvinnu sem hann skipulagði fyrir Holland fyrir nokkrum árum og heimfærir hér upp á Ísland. Samhoud rekur 200 manna ráðgjafarfyrirtæki með höfuðstöðvar í Hollandi.
- Fyrirlestur Jeff Taylor fjallaði um skapandi hugsun og mikilvægi þess fyrir frumkvöðla að gefast aldrei upp. Taylor hefur stofnað nokkur fyrirtæki, en er þekktastur fyrir að hafa sett á fót stærstu atvinnumiðlun í heimi; Monster.com.
