BREMSUVÖKVI
Eiginleikar bremsuvökvans eru að smyrja dælurnar að innan og verja þær fyrir ryðmyndun. Bremsuvökvi er mikilvægur fyrir bílinn og gott er að láta skipta um hann reglulega. Ef það vantar bremsuvökva er annað hvort vökvinn kominn í framdælurnar vegna þess að klossarnir eru búnir eða leki er á bremsukerfinu. Þá þarf að láta fagmenn um lagfæringu. Ef klossarnir eru búnir fer vökvinn aftur upp í forðabúrið þegar stimplunum er þrýst inn til að koma nýjum klossum fyrir.

FRÓÐLEIKUR UM DEKKIN
Mældu þrýstinginn í dekkjunum og hafðu hann samkvæmt upplýsingum í handbók bílsins. Upplýsingarnar geta einnig verið á límmiða í dyrakarmi (bílstjórahurð) eða innan á bensínloki. Réttur og jafn þrýstingur í dekkjum eykur endingu dekkjanna, gerir bílinn stöðugri og öruggari.

FRÓÐLEIKUR UM DEMPARA
Um leið og þú skoðar pústkerfið skaltu líta á demparana. Sé olíuleki greinilegur (blautur) er komið að endurnýjun. Demparar eru alltaf endurnýjaðir tveir og tveir saman, þ.e. báðu megin að aftan, báðu megin að framan eða allir fjórir samtímis.

FRÓÐLEIKUR UM KVEIKJUKERFIÐ
Auk vatnsleka munu gangtruflanir vera algengustu bilanir þegar farið er að aka lengri vegalengdir með hraðinn bíl. Langflestir bensínbílar eru núorðið með rafeindakveikju (engar platínur) og sumir eru kveikjulausir. þrennt er algengasta uppspretta bilana í kveikjukerfinu og í þessari röð: Útfelling á leiðslutöppum innan í kveikjuloki, léleg kerti og ónýtir kertaþræðir. Til að losa kveikjulokið og skoða það að innanverðu þarf oftast stjörnuskrúfjárn en í einstaka tilfellum sk. torx-skrúfjárn (fást í settum á þjónustustöðvum N1).

Til að hreinsa það og kveikjuhamarinn, þarf einungis nett skrúfjárn. Þetta er gert varlega og þannig að hvíta hrúðrið á töppunum innan í kveikjulokinu er skrapað af með skrúfjárninu. Vísinn á kveikjuhamrinum er nóg að pússa með sandpappír. Fjöðrina ofan á honum borgar sig ekki að eiga við. Blásið úr lokinu áður en það er sett á aftur og úðið yfir það með rakavara fyrir kveikju sem fæst á næstu þjónustustöð (hristu brúsann vel áður en þú úðar). Oft nægir þessi einfalda aðgerð til að merkjanleg breyting verður á lausagangi vélarinnar, vinnslan eykst og eyðslan minnkar.

Til að kanna hvort kertin séu í lagi nægir að taka eitt þeirra úr en áður en þú gerir það skaltu láta vélina kólna vel. Flestar vélar eru núorðið með hedd úr áli og geta gengjurnar í kertagötunum skemmst ef kertin eru skrúfuð þegar heddið er heitt. Ef þú hefur ekki loftþjöppu skaltu fara með grannt skrúfjárn niður með kertinu til að losa óhreinindi sem kunna að vera þar, losa upp á kertinu og blása síðan niður með því áður en það er skrúfað úr. Kerti slitna þannig að neistinn eyðir skautinu og sést þá greinilega geil eða þynning á neðra L-laga skautinu þar sem neistinn hleypur á. Sé svona slit sjáanlegt borgar sig að skipta um öll kertin. Kertabil er alltaf gefið upp í handbók bíls (spark plug gap) og oft á miða í húddinu. Treystu því ekki, þegar þú kaupir ný kerti að bilið á þeim sé rétt. Millimál til að mæla kertabil fæst í verslunum N1. Kertaþræðir geta gert manni lífið leitt.

Til að draga úr útvarps-og sjónvarpstruflunum eru notaðir þræðir með leiðandi kolefni í stað málms. Sé slíkum þráðum ekki vel fest í þar til gerðar klemmur á vélinni styttist ending þeirra verulega. Fyrstu merki um slaka kertaþræði eru oft truflanir (tikk) í útvarpstæki bílsins þegar farið er á milli stöðva á FM-bylgju.

Til þess að ganga úr skugga um ástand þráðanna þarf viðnámsmæli. Viðnám allra kertaþráða á að mælast svipað. Frávik, áberandi meira viðnám, þýðir að þráður er ónýtur. Það er ekki mikið mál að skipta um þræðina. Vissara er að skipta einungis um einn í einu því það er ekki sama í hvaða röð þeir eru frá kveikjunni. Ljúktu yfirferðinni yfir kveikjukerfið með því að rekja allar grannar sogslöngur sem liggja frá soggreininni, blöndungnum og kveikjunni (flýtinum). Athugaðu hvort slöngurnar séu heilar í endann, þéttar uppi á stútum og á samskeytum. Sé einhver þessara sogslangna lek eða laus dregur vélin falskt loft en við það vinnur hún verr og eyðir meiru.

FRÓÐLEIKUR UM KÆLIKERFIÐ
Vantar vökva á kerfið? Á vatnskassanum er lok. Það lok skaltu ekki opna nema vélin sé örugglega köld. Til hliðar við vatnskassann er yfirfallskútur úr plasti. Hann þekkist m.a. á því að fremur grönn slanga liggur frá honum í vatnskassann (í sumum bílum er auðvelt að ruglast á rúðusprautugeymi og yfirfallskúti kælikerfis). Utan á yfirfallskútnum er merking sem sýnir hve borð vökvans á að vera hátt þegar vélin er köld og þegar vélin er heit. Þurfi að bæta á kerfið er hellt í yfirfallskútinn. Hann má opna hvort sem vélin er heit eða köld.

Skoðaðu enda vatnshosanna sem liggja frá vatnskassanum, önnur neðst úr kassanum og í stút vatnsdælunnar neðarlega á vélinni en hin efst úr kassanum og í vatnslásinn ofarlega á vélinni (heddinu). Sjáirðu merki um leka með stútunum skaltu herða hosuklemmurnar. Leki hosa þarf að skipta um hana. Í gegn um þilið, hvalbakinn, aftan við vélina, liggja tvær slöngur að miðstöðinni inni í bílnum. Þær tengjast vélinni á tveimur stöðum, önnur vatnsdælunni en hin heddinu. Á þessum slöngum eru samskeyti. Sjáist merki um leka þarf að herða á hosuklemmunum eða endurnýja slöngurnar.

Kælikerfinu tilheyra oft grennri vatnsslöngur sem tengjast soggreininni rétt neðan við blöndunginn (til að hita bensínblönduna svo hún eimist betur). Skoðaðu þessar slöngur og lagfærðu eða skiptu um ef þú finnur leka.
Settu ekki vatn á kælikerfið. Á því á að vera frostlögur blandaður til hálfs með vatni allan ársins hring. Leki í kælikerfi er algeng bilun í bílum á ferðalögum.

LOFT Í DEKKJUM

• Með réttum loftþrýstingi í dekkjum rúllar bíllin betur
• Með réttum loftþrýstingi í dekkjum rúllar bíllinn betur og við það minnkar eldsneytis notkunin. Þú hagnast á því. Samtímis minnkar þú koltvígildis útblástur en það hjálpar til í baráttunni við gróðurhúsaáhrifin.
  Með réttum loftþrýstingi endast dekkin betur
• Ef þú ekur með 80% af uppgefnum loftþrýstingi í dekkjunum þá minnkar lífslengd dekkjanna um 20%. Ef þú ekur með 70% af uppgefnum loftþrýstingi í dekkjunum þá getur lífslengd dekkjanna minnkað um 50%.
• Athugaðu loftþrýstinginn reglulega
• Flestar yngri bílgerðir eru með dekk sem þurfa meiri þrýsting en við erum vön frá fyrri tíð. Uppgefinn loftþrýsting finnur þú í handbók bílsins, við bensínlokið eða innan á hurðarstafnum. Mundu að það á alltaf að mæla dekkin köld.

FRÓÐLEIKUR UM LOFTSÍUNNA
Loftsíu ætti að skipta um á 25-35 þús. km fresti. Tíðari skipti eru óþörf, a.m.k. ef notuð er FRAM sía.
Sé sían áberandi óhrein skaltu skipta um hana; eyðslan minnkar við það.

FRÓÐLEIKUR UM PÚSTKERFIÐ
Núorðið eru flest pústkerfi hengd upp með til þess gerðum gúmhringjum. Þannig geta þau fjaðrað í festingunum og bila því síður.
Athugaðu undir bílinn hvort gúmhringirnir eru allir á sínum stað og í lagi. Þeir eru yfirleitt tveir á hverri festingu, hvor sínum megin og festingarnar oftast 2 eða 3.
Auðvelt er að smokra hring upp á festingu. Sé haldið af stað með pústkerfið dinglandi eru líkur á því að það verði ekki samferða heim.
Gúmhringirnir fást í Verslunum N1

FRÓÐLEIKUR UM RÚÐUSPRAUTUNA

• Hvar fyllir þú á rúðuvökvan?
•  Þú finnur geyminn fremst í húddinu innan á öðru hvoru frambrettinu.
• Tappinn er oftast merktur með mynd af rúðu/þurrkum.
• Það getur komið sér illa vanti vökva eða vatn á rúðusprautuna. Hægt að er fá rúðuvökva á öllum Þjónustustöðvum, Verslun og Bílaþjónustu N1.
  • Smurþjónustu
  • Verslunum
  • Þjónustustöðvum N1

FRÓÐELIKUR UM SMUROLÍUNA
Mældu smurolíuna á vélinni eftir að bíllinn hefur staðið í 5-10 mín eða lengur. Sé smurolían greinilega hrein skaltu ekki skipta um hana, þá nægir að bæta á ef vantar. Sé olían dökk, svört og/eða bensínlykt af henni skaltu láta skipta um smurolíu og smursíu.