Fróðleikur um kveikjukerfið

Auk vatnsleka munu gangtruflanir vera algengustu bilanir þegar farið er að aka lengri vegalengdir með hraðinn bíl. Langflestir bensínbílar eru núorðið með rafeindakveikju (engar platínur) og sumir eru kveikjulausir. þrennt er algengasta uppspretta bilana í kveikjukerfinu og í þessari röð: Útfelling á leiðslutöppum innan í kveikjuloki, léleg kerti og ónýtir kertaþræðir. Til að losa kveikjulokið og skoða það að innanverðu þarf oftast stjörnuskrúfjárn en í einstaka tilfellum sk. torx-skrúfjárn (fást í settum á þjónustustöðvum N1). Til að hreinsa það og kveikjuhamarinn, þarf einungis nett skrúfjárn. Þetta er gert varlega og þannig að hvíta hrúðrið á töppunum innan í kveikjulokinu er skrapað af með skrúfjárninu. Vísinn á kveikjuhamrinum er nóg að pússa með sandpappír. Fjöðrina ofan á honum borgar sig ekki að eiga við. Blásið úr lokinu áður en það er sett á aftur og úðið yfir það með rakavara fyrir kveikju sem fæst á næstu þjónustustöð (hristu brúsann vel áður en þú úðar). Oft nægir þessi einfalda aðgerð til að merkjanleg breyting verður á lausagangi vélarinnar, vinnslan eykst og eyðslan minnkar.

Til að kanna hvort kertin séu í lagi nægir að taka eitt þeirra úr en áður en þú gerir það skaltu láta vélina kólna vel. Flestar vélar eru núorðið með hedd úr áli og geta gengjurnar í kertagötunum skemmst ef kertin eru skrúfuð þegar heddið er heitt. Ef þú hefur ekki loftþjöppu skaltu fara með grannt skrúfjárn niður með kertinu til að losa óhreinindi sem kunna að vera þar, losa upp á kertinu og blása síðan niður með því áður en það er skrúfað úr. Kerti slitna þannig að neistinn eyðir skautinu og sést þá greinilega geil eða þynning á neðra L-laga skautinu þar sem neistinn hleypur á. Sé svona slit sjáanlegt borgar sig að skipta um öll kertin. Kertabil er alltaf gefið upp í handbók bíls (spark plug gap) og oft á miða í húddinu. Treystu því ekki, þegar þú kaupir ný kerti að bilið á þeim sé rétt. Millimál til að mæla kertabil fæst í verslunum N1. Kertaþræðir geta gert manni lífið leitt. Til að draga úr útvarps-og sjónvarpstruflunum eru notaðir þræðir með leiðandi kolefni í stað málms. Sé slíkum þráðum ekki vel fest í þar til gerðar klemmur á vélinni styttist ending þeirra verulega. Fyrstu merki um slaka kertaþræði eru oft truflanir (tikk) í útvarpstæki bílsins þegar farið er á milli stöðva á FM-bylgju.

Til þess að ganga úr skugga um ástand þráðanna þarf viðnámsmæli. Viðnám allra kertaþráða á að mælast svipað. Frávik, áberandi meira viðnám, þýðir að þráður er ónýtur. Það er ekki mikið mál að skipta um þræðina. Vissara er að skipta einungis um einn í einu því það er ekki sama í hvaða röð þeir eru frá kveikjunni. Ljúktu yfirferðinni yfir kveikjukerfið með því að rekja allar grannar sogslöngur sem liggja frá soggreininni, blöndungnum og kveikjunni (flýtinum). Athugaðu hvort slöngurnar séu heilar í endann, þéttar uppi á stútum og á samskeytum. Sé einhver þessara sogslangna lek eða laus dregur vélin falskt loft en við það vinnur hún verr og eyðir meiru.